Gindima: kasave e Rom
Gindima...
Varikana sikana kana o Sunto Del gindisardas jekh, haj
ande peski lashi voja kerdas peske e luma.
Vi kerdyilas kasavi soski kerdyilas, jekh chi zhanav, e
romen sostar kerdas.
Shajke anda kodi te cirden e manusheski gilyi te khelen,
haj te gilyaben.
Vi kerdyile e rom kasave, soske si, haj vi gilyaben penge
andej luma sar nashade kerdyile.
Nashen, gilaben haj kamen. Kade sar von khonyik chi
zhanel.
Kon kadi chi patyal aven mande haj pushen man, chachipe
phenav vaj nichi.
Avilamtar anda amari shukar phuv, andaj Indija, haj
kasave kerdyilam, soske chi kamlam te avas.
Eftashela bersh avilam anda amari Indija, haj reslam ande
gazhikane thema. Aba na ame cirdas e gilya, amare gilya cirde von...
Grastenca avilam, vurdonenca, haj reslam kathe andej lole
thema.
Ke o rom si buzhangle kamel te puterdyol o jilo, phenel
paramichi, te traji anda varisoste, te na meren bokhatar sar e ciriklya pej
kopacha andej bare shila.
So te phenav tumenge. Avile e chorre te keren penge patyiv
haj barvalipe. Haj so das o Del so na, kerdyile patyivale haj barvale.
Barvale-barvale, ke baro dyi si ande le. O Del das le
kasaveske, ke kamen e Devlores penge. Ke sar avlas haj zhanas pel kodol bulhe
droma sa-sa e Devles mangenas, haj rudyinas.
Kade trajin mure phral, mure nyamura andej bari lumja.
