A kis gyufaárus lány - lovári fordítás

A kis gyufaárus lány - lovári fordítás

    

Írta: Hans Christian Andersen         

Bares shudro jivend sas, perdas e jiv, thaj aba ratyilas. Le bershesko paluno dyes sas. Ando pogano shil jekh chorri shejori phirdas pe le tyunyarike droma. Sherangli thaj phurangli sas. Kanak avilas-tar kheral, inke sas le shlyappa pe lake punre, ba chi hasninelaslen butaig. 

Vi bare sas kodol shlyappa, - varikanak inke laki dej hasnindaslen. 

Thaj akanak, sar po drom akorde avile duj vurdona, anglal kodol rigate xuklas e shejori -, thaj le shlyappa tele ashile pala lake punre. Jekh shave nashlas-tar jekhesa, thaj avri assajlas la sha; - kodo phendas lake: lashi kun avla kodi, kanak ansurisajvela. Chorri shejori chi kaver shlyappi chi rakhlas aba.

Phurangles phirdas majdur le dromen, thaj lake cine punre vunete thaj lole kerdyile andar o shil. Vi leski kretinca aba numa jekh kirpa sas. 

Ande laka pharrada posotyi jagalya sas, thaj ande lako vast lengi kutija.

Sorro dyes zumadas te bikinaren kodol, ba khonyik chi kindas latar na jekh chi. 

Bokhales thaj izdrales vash o shil, gelas majdur. Kasavo brigaslo sas kade te dikhenla ande bare chorrimaste, hoj kathar kodo vi jilo praphadyol! Pe lake krece bala ablyolindo jiv astardyilas -, ba voj chi gindindas kadalesa.

Andar le felyastri ablyolindo fimlalipe thaj peke papinyakeski lashi shung shordyilas avri po drom, ke sirbotaro sas, le bersheski paluni ratyi. Chorri shejori sakokanak numa pe kado gindindas.

Garadyilas pe jekh uluv, pala jekh kheresko kolco, thaj tela peste cirdas lake nange punre. Kothe inke majzurales shudrajvelas, izdradasla le Devlesko shil, ba chi tromajlas khere te zhal, ke chi bikindas-tar khanchi, chi rodas adyes na xurde love chi, thaj kade lako dad malavelasla.

Thaj na khere chi mishto-j lake, ande lenge podeski soba vi le ruva vurlyanas vash o shil. Pe zidengo pharrajipe perdal andre phurdel e balval, chi zhutil pe kado na kodo chi, hoj sulumesa thaj kirpasa pherdine andre le xiva.

Aba intregones pahosajvline lake naja. De lasho avla numa jekh jagalyi, numa jekh! Avri te cirdelas jekh andar e kutija, phabarelasla, thaj kaj laki para shaj tatyarelas lake vasta! Palunes gindindaspes, thaj phabardas jekh jagalyi. Kasavo vojakes phabardyilas opre laki para! Fimlali sas thaj tati, sar la memelyaki para, thaj e shejori bukurijasa shuttas opre pe kodi lake vasta.

Axtom para sas kodi! E chorri shejori kade hatyardas, sar te beshelas angla shukar xarkuno tatyariko. 

Kasavo mishto sas te dikhen e jag, kasavo blago sas te tatyon pasha leste! Aba vi lake punre avri lungosardas, hoj perdal te phirellen o tatyipe, ba ando kodo minuto avri sutas la jagalyaki para, xasardyilas o xarkuno tatyariko, thaj e shejori kothe beshlas le shudre zidesko kolco.

Angle las jekh kaver jagalyi, thaj phabardasla. Kothe perdas o nuro po zido, jekh cerra fimlalipe das, thaj pe kodo than perdal dikhimasko kerdyilas o zido, sar te avel glazhuno. E cini shejori shaj andre dikhlas andej soba. 

Bari mesalya tordyilas kothe andre, tele sharavindes parne colosa.

Rajikane vasuri ablyile pe kodi, thaj po mashkarutno than frukturenca pherindes papiny shungajvelas. 

Thaj so feder axtom sas: e peki papiny jekhfar numa avri xuklas andar o charo, thaj ande lako dumo shurisa thaj furkasa gelas kaj e shejori. De jaj! Palesh avri sutas e para, thaj aba palesh chi dichilas kaver, numa o shusho, shudro zido.

Majnyevi jagalyi phabardas: kaj lako nuro axtom krechunosko kasht dikhlas, feder majshukar thaj majablyolindo, sar so krechuneska ratyasa dikhlas ande barvale sheftarisko kher, kanak andre dikhlas pe glazhuno vudar perdal. Kothe beshlas tela o kasht, thaj dikhelas shel thaj shel memelya pe le kranzhengo agor. Thaj dikhelas le turcke disura, so zh-akanak inke nichikanak nashtig dikhlas.

Aba  unzhardas lako vast, hoj tele te len jekh diso, ba atunchi palesh avri sutas e para, thaj le but cine krechunese memelya lokhes opre vazdajvline. Opre, intregones zhi kaj o cheri, thaj kothe ablyolinde cherhaja kerdyile andar kodol. Jehkfar numa avri avilas mashkar kodolendar jekh cherhaj, thaj tele perdas. 

Fimlalo lenija shindas po tunyariko cheri.

- Varikon merdas! – phendas e shejori: serilaspes pe kodo, hoj laki mami (e korkoruni manush, kon lashi sas lesa, thaj kon aba dulmut merdas) jekhfar kodo phendas: „Sagda, kanak tele perel jekh cherhaj, jekh dyi tordyol angla o Del.”

Palesh kethane mordas e jagalyi thaj e kutija, thaj sigones baro fimlalipe kerdyilas krujal late. Ando uzho nuro kothe tordyilas lako mami, kon aba dulmut merdas, thaj skumpes dikhlas la chorra sha, sar kon akharella.

-  Mami! – cipindas opre e shejori. – Mami, ingerman tusa! Zhanav kodo, hoj kathe mukhesaman, kanak e jagalyi nachol. Xasardyuvesa, sar o tato tatyariko thaj e peki papiny, thaj le axtom shukar krechunosko kasht! Te na mukhman kathe, mami!

Thaj sigo kaj e kutija mordas sa jagalya, hoj kothe te ashavel laka skumpa mami. Andar le but jagalya kasavo nuro sordyilas avri, sar te peklasas o Kham. E mami inke nichikanak nas kasavi shukar thaj zurali. 

Ande lake mujsa lasla thaj angalyi das la sha, apol opre vazdajvlas lasa. Opre, opre ando uchipe, kaj naj shil, naj bokh, naj dar; kothe, kaj numa voja thaj fimlalipe si.

Pej shudri detehara kothe arakhline la cini sha, ande kheresko kolco. Laki musura lolo kerdyilas thaj asandilas, ba trajo aba nas ande late. 

Pahosajvlas pej ramenca-pherdi ratyi. Kothe pashlyilas e muli shejori pe le nyeve bersheski detehara, krujal late but-but nasula jagalyanca.

- Te tatyon kamlasas chorri shejori! – phende le manusha. 

Chi zhanglas khonyik, kabor shukaripe dikhlas, thaj kasavo nuro sas krujal late, kanak ande laka mamake kuja palunes mukhlas-tar kadi tunyariki luma.

( Boldasles: Pató Selam)