O andyelo
Írta: Hans Christian Andersen
Az angyal - O andyelo / Andresen meséjét lovári nyelvre
átültette: Pató Selam
Varisodevar, kanak merel jekh lasho shavoro, le
Devlesko jekh andyelo hural tele pej phuv. Ande leske kuja lel o cino mulo,
avri putrel leske parne phaka, thaj hural-tar opre kodol plaja, so kamelas o
shavoro. Kidel jekh burnyikasle luludya, so opre anel le Deleste, hoj kothe
inke majshukares te luludyaren, sar kathe pej phuv.
O lasho Del leske jileste kikidel sako luludya, thaj so
voj o legmajzhurales kamel, chumi della, thaj kathar kado andej luludyi glaso
arakhadyol, sosa shaj gilyabarel kothe, andej la pachako them biagoresa.
Etalo, kado sakofelo le Devlesko andyelo mothilas,
kanak jekh cino mulo andas opre ando cheri, thaj o shavoro kade shundas
sakofelo, sar te dikhlasas suno. Kade hurajline von, opre pe lesko dejaki phuv;
sakokaj, kaj o shavoro angla kodo kheldaspes, opre pe le shukara bara, kaj
axtom luludya puterdyile.
- Soske luludya te anas amenca, hoj perdal te beshavas
ando Devlesko them? – pushlas o andyelo.
Shukar, sani ruzha tordyolas kothe, ba jekh pogano vast
phagerdas laki thuluj kade, hoj lake dopash-puterde luludya bizhuvindes sas
aba.
- Chorri ruzha! – phendas o shavoro. – Te inger tusa,
hoj opre, le Devlesa, palesh te shaj luludyarel!
Thaj o andyelo las e ruzha, chumi das le shavores,
kaske jakha kathar kado dopash-puterde kerdyile. Tele shingerdine vi unyi axtom
luludya, ba lenca ingerdine vi le chorre luludya.
- Aba si amen luludya! – phendas o shavoro, thaj o
andyelo kodo phendas pe kado: bater -, ba inke chi geline opre le Devleste.
Ratyi sas, e legmajbari pacha sas sakokaj. Ashlie ando baro foro, andej
legmajtang vulyica hurajline kathe-kothe. Le muchipesko dyes sas, ande plajici
kidyile le melya, le ushara, le pusa. Phagarde tejara, gipseske kotora, dirzi
thaj phurane stadya sas kethane-palpale pej phuv, so zhungales dichuvenas,
brigaslo kerdyilas lendar, kon dikhlaslen.
Thaj o andyelo ande kado kaos sama las jekh luludyake
hirbeske kotora. Thaj sikadas pe jekh burnyikasli phuv, so avri perdas andar
kodo. Jekh malaka mula luludyako vuna inkerdas kethane kodi burnyikasli phuv,
ba e luludyi aba chi trajilas, vash kodo shudine avri pej vulyica.
- Kadi amenca ingras -, phendas o andyelo. – Sostar?
Maj mothuvo, mashkar o uralipe.
Tele, ande kadi suni vulyica, tela jekh cino, tunyariko
kher, ande jekh gropa, trajolas jekh chorro, nasvalo shavoro. Leske
arakhadyipestar le patosko phanglo sas. Kanak o legmajzuralo sas, vi atunchi
numa andej soba zhanelas krujal te langan, kopalenca ande leske vasta. Sas le
kasave milajake dyesa, kanak le khamaske razura tele resline leste, pe dopash
chaso perdal. Atuncki o cino shavoro ando nuro beshlas, leske naja angla leske
jakha shuttas, kade dikhlas kodo, sar shordyol ande kodol o lolo rat. Atunchi
le vechinura kodo phendine pala leste: adyes avri si.
O vesh thaj la primavarako axtom zeleno rang numa
kathar kodo pinzhardas, hoj le vechinesko shavo andas-tar leske le bersheski angluni
dzhindzhonineski kranzha. Kado opre pe lesko shero vazdas, apol kodo suno
dikhlas, hoj tela le dzhinzhonina phirel, kaj pekel o Kham thaj gilyabaren le
chiriklya. Pe jekh shukar primavarako dyes le vechinesko shavo la malake
luludya andas leske. Mashkar kodol sas jekh luludyi, soske inke ashilas laki
vuna. Ando hirbo beshadinela, pasha lesko pato shutte la felyastrate.
Baxtalo vast beshadas-tar e luludyi, ke xutyildas,
nyeve kranzhi andas, thaj pala bersheste pe bersheste luludya rakhadas. Le
chorre shaveske kado kerdyilas leski luludyasli bar, leski avucija pej phuv.
Sako dyes paji shordas pe kodi, ando nuro shuttasla, hoj te resella le Khamasko
razo, so tela e phuv andre shaj avilas. E luludyi inke vi ande lesko suno kothe
sas, ke leske luludarelas, leske shungajvelas, leske jakha shaj dikhenas la
luludyako shukaripe.
Pe kodi dikhelas, kanak merdas, kanak o Del
akhardas-tar les. Pe jekh bersh perdal sas aba o shavoro kaj le Del. Pe jekh
bers perdal bisterdyilas e luludyi, avri shutyilas, thaj kanak le manusha
muchinas, avri shudine pej vulyica, mashkar le melya. Thaj kadi luludyi si
kodi, so ame andre shuttam mashkar amare luludya. Ke kadi luludyi majbut
bukurija das, sar jekh krajaskinyaka baraki legmajshukar luludyi.
- Ba tu kathar zhanes kado? – pushlas o shavoro, kas o
andyelo ando cheri andas opre.
- Zhanav! – phendas o andyelo -, ke me somas kodo cino,
chorro shavoro, kon langajlas. Pinzharav muri luludyi!
Thaj atunchi o shavoro intregones avri puterdas leske
jakha, thaj dikhlas le andyeleski ablyolindi musura. Ande kado minuto kothe
resline le chereste, kaj sakokanak bukurija thaj pacha si. Thaj o Del pe lesko
jilo las o mulo shavoro, angalyi dasles, thaj atunchi vi leske bariline phaka,
sar o kaver andyeleske.
Line jekhavresko vast, kade hurajline majdur, kethane.
Thaj o Del leske jileste kikidas intregi lulugya, ba la malaka chorra, shuka
luludya vi chumi das. Kodola glaso kerdyilas, thaj kethane gilyabardas le
andyelenca, kon krujal le Deleste hurjline. Ande cine kruja, pasha le Deleste,
ande majbare kruja, majdur le Delastar, ande majbare thaj majbare kruja,
biagoresa, losshasa. Thaj sakon gilyabarenas, le cine thaj le bare, le lashe
shavore, thaj le malaki chorri luludyi, so le manusha, kon mucindine, avri
shudine mashkar le melya, pej tang, tunyariki vulyica.
Nema komentara:
Objavi komentar