Norvegijakeri rechti regirung fabot le kudulinipeske kamla

Andi Norvegija pal o kamipe la regirungatar andar rechtskonservativi taj rechtspopulistscha le kudulinipeske upre thana ando pradipe kamla. O parlamento ande Oslo ando maschkarutno juni jek tschatschipe diskutirintscha. Akan ando linaj o gemajntscha le kudulinipeske upre lengero than jek fabot schaj ar den, ando linaj 2015 jek fabot andi cili Norvegija te del.

Ko o tschatschipe ande na likerel, iste potschinipeha vaj dschi trin masektscha astaripeha, genel. O justicakero ministeri Anders Anundsen andar i rechtspopulistischi fortschrittspartaj (FrP)adale keripeske use phentscha, taj jek „khetanipe“ maschkar o kudulinipe taj i kriminaliteta upre sikatscha. 

Pal birovtschagengero phenipe ando scheroskero foro Oslo atschi lojengere tschakengere tschoriptscha del, sar ando foro Berlin, kekaj ando foro Oslo eftavar tschuleder dschene dschin.

Kritikertscha adale tschatschipestar la regirungake angle tschiden, hot adale kudulinipeskere fabotiha butvar le Sinten taj Romen te resel kamna. O Bard Vegar Solhjell andar i oposicijonakeri partaj socijalistische linke phentscha, hot adala keripeha o ande roasinipe la flogoskera grupnake fabijatim te ol, afka sar angle 200 berscha le dschidovtschenge o ande roasinipe andi Norvegija le favosinipestar fabijatim sina. 

O aun lipe le tschatschipestar duach o rotscha hetvin kiratiske ham ar kerdo koja sina.

Ekspertscha varninde, hot o kudulinipeskero fabot i kriminaliteta meg utscheder kerlaha. 

Ko dschijakana kudulintscha, „mujsim ovla, hot te tschorel dschal“, phentscha o schero jeke drogeniskere pomoschagoskere khetanipestar le televisakere senderiske TV2.