O rom o haj o beng
Írta: Rostás-Farkas György
O rom pe gavesko agor beshlas peska familijasa. Zurales
chorre sas. Sas les duj shuke grast, haj kattyi shavora, chi voj chi zhanglas
sode si. Jekhar intya phirelas o raj, haj dikhlas le nange shavoren. Kothe
akharel le romes peste.
— More, me dav tuke jekh kotor phuv, te phagres opre,
shuv sumburo ande phuv, ke me dikhav, tume bares chorre san.
— Najis tuke raja tyo baripe! De chi plugo chi si man!
— Me dav tuke plugo, av pala leste!
O rom gelastar pala leste, haj ingerdas les kothar.
Gelastar avri pe phuv grastenca, haj phagrelas pesko shero, akanak so te kerel.
Pharo dyi das.
— Korkoro chi zhal e butyi, khonyik chi avel akorde, vi
inke o beng mishto avla, te zhutij mange.
Kana voj avri phendas e vorba, avilas o beng.
— Akhardan man, more, avilom. Me zhutij tuke, de kathe
trubuj te des dopash, so del e phuv.
— Mishtoj, dopash mange, dopash tuke. Savo trubuj tuke,
so si telaj e phuv, vaj so si opral pe phuv?
— Mange kodo trubuj, so si opral pe phuv.
Kerdine e butyi, vi o beng cirdas o plugo, ke o rom
kade phendas, kodi butyi majbipharij, sar e grasten te tradel. Ande phuv gilchi
shutine. Kana avilastar e tomna, o rom khere ingerdas e gilchi, haj o beng numa
le gilchake thuluja kidelas kethane. O beng xojarnyiko kerdyilas, haj phendas e
romeske:
— Andre xoxadan man, more! Ando kaver bersh kodo trubuj
ma, so si telaj e phuv.
— Mishtoj muro vortako!
Kade avlas. Ando kaver bers o rom detelina shuvelas
ande phuv. Kana avilas e tomna, o rom tele shindas e char, haj azhukardas e
benges. O beng pale xojarnyiko kerdyilas, ke o rom pale xodas e benges, numa
rikiti ashile le bengeske.
— More, pale xoxadan man! Akanak aba ingrav tut ando
poklo.
— Mishtoj muro bengoro, muk mange kodi, mure
shavorendar te lav chumid!
— Me chi bunuj, de vi aba te zhas!
Sar zhanas karing le romesko nasul kher, le but nange,
bokhale shavora cipin dural:
— Tata, tata, so andan amenge? Lasho xamasko andan,
tata?
O beng ashunel so cipin le shavora, haj dikhel le but
bokhale, kalye jakhenge shavoren, kon nashen karing leste. Darajlas, ke kodi
gindisardas pes, les kamenas te xan le shavora. Sigo boldas pes, haj
nashlas-tar. Inke zhi lungo vrama ande pesko kan sas le bokhale shavorengo
glaso: tata, tata, kaj o xamasko?
— Kothe nashel o xamasko, mure shavorale! Inke dikhen
les? — haj assajlas pe xoxado beng.
Nema komentara:
Objavi komentar