Translate

30. 01. 2014.

Paramicha pala e pogani glinda




Paramicha pala e pogani glinda  
  
Írta: kínai mese    

Lovári fordítás / Pató Selam: Angla kado butshela bershenca inke na pinzharenas e glinda andej Korea. Andar e durutni Kína, andar o mashkarutno them, ingerdine kothe le anglune glindi. Bisiklo dyelo sas kodo atunchi; kanak varikon zhanglas te kinel kodo, sakon kodoleste phirelas, hoj rama te shaj dikhenas. Ba legmajbut manusha chikanak chi ashunenas pala e glinda, pala kodolako anav, vaj hiro. Trajilas ando Kangvon jekh barvalo plugari. Jekhfar ingerdas variso hoj te bikinel ando angluno foro, ando Songdo, thaj sar lashi mita zhanglas te kerel, ande peski lossh kindas peske jekh glinda. Vojakes gelas lasa khere. Khere andej bari tajni lelas e avucija, dikhlasla, - thaj so dikhel? Jekh phuro plugari dikhelasles andar e glinda.

Assalas e plugari, thaj atunchi vi kodo kaver palpale assalas pe leste andar e glinda. Amare plugares bari voja kerdyilas ande kado khelipe, thaj kodo dyesestar sako dyes angla las e shukar glinda, assada musurasa dikhlasla, thaj andej bari lossh bisterdas leske sa problemo. Pala kodo garadas-tar e glinda ande jekh bari kutija, ke sakonestar daravelas lesi bisikli avucija.

Ba leski zhulyi sama las, hoj o mursh sakokanak losshalo-j, dilore musurenca khelelpes angla e glinda. Apol pe jekh dyes, dikhlas e zhulyi, hoj lako mursh jekh obli glazha dikhel, losshal katha o shukaripe, so kothe dikhel, thaj vojakes assal, sar kaske naj khanchi problemo pej phuv. Apol le plugareske sas dodta bida peske phuvesa, kade chi hatyardasles e zhulyi. Numa chudisarelas ande peste, thaj feder atunchi, kanak kodo dikhlas, hoj lako mursh e obli glazha tajniskes phanas-tar andej bari kutija.

E zhulyi bares kmlasas te shaj zhanel, ande soste lel kasavi bari voja o plugari, thaj gindisardas: pala kodo phirel. Numa lasho shajipe azhukarelas. Pe kaver dyes, kanak o plugari avri gelas pej phuv, sar te kerel butyi, e zhulyi harnyikes avri puterdas e kutija, thaj arakhlas e grizhindi avucija. Ba e glinda tele boldindes pashlyolas andej kutija, thaj e zhulyi numa kodolaki shukar gradyija shaj dikhlas, so loli phanruni chipta shukarelas. 

Pe la glindako paluno rig, so somnali xarkomuni butyi sas, jekh keresko tasvir sas, bashade ternenca, opre o zvoro cine podosa. Butaig dikhelas vi e zhulyi kadal shukarimata, thaj chi gindisarelas pe kaver, sar vi le plugares le bashade ternengo tasvir lossharel. Paha rakhlas, thaj e obli glazha grizhindes palpale shuttas andej kutija, kade, hoj kodolako kaver rig na dikhlas.

Khere relas ratyasa lako mursh. Oune tele nakhadas leska ratyako xaben, sigo andre phandadyilas andej soba, avri puterdas e kutija, las e glinda, thaj dilora musurasa dikhelasla. Leski zhulyi, kon dikhelasles perdal pej xiv, so shinadas andej hertijuni felyastra, - akanak na zhanelas aba, so te gindisarel?
- Dilajvlas chorro -, phendas ande peste. - Godyaver manush chi dikhel kasave musurenca pe la xarkomune formi. Aba kamlasas te zhal-tar kathar lako garadyimasko than, kanak sama las kodo, hoj lako mursh la obla glazhako kaver rig dikhel. Chi la zhulyake chi trubulas majbut! Daba zhukarelas, hoj korkores te ashol. Atunchi apol avri chordas e glinda andar e kutija, boldasla, - thaj etalo: jekh zhulyako tasvir dikhelas pe late kathar, intregones kasavi, sar voj! Nasul hatyaripe kerdyilas ande late. Zurales xolyajvlas pe lako mursh, kon misto kodo, hoj la te kamelas, jekh kaver zhulyako tasvir dikhel andej tajna.

,,Aketa! Vash e zhulyi sas ando foro angla kado cerra vramasa -, gindisarelas kerkes. - Inke jekh zhulyi andas ando kher! Me aba pe but primavari trajos, lokhes phurajvav, kade kaver zhulyi las!" Dukhasa dikhelas le kaver zhulya andej glinda, vi rovelas, vi assalas, ande peski xolya. Kodi kaver (kade mezil:) sunusardasla, ke vi kodi rovelas, ba pala kodo poganes avriassalasla.

E chorri zhulyi kerkes gelas kaj e sokra, hoj te mothol lake pala peski bari briga. Kodi chi patyalas, hoj lako shavo inke jekha zhulya las peske, ba kade gindisarelas: bisiklo-j kado pecipe, thaj manglas peske bora: te mukhel te dikhel vi voj la kaver zhulya.

Kanak andre dikhlas andej glinda, jekh inke majphura zhulya las sama ande kodi. Chi zhanelas te htyarel kodo: sar shaj lel jekh godyaver manush kasava zhungala zhulya peske?
- Dikh-ta! Kaddi zhulyi kasavi phuri-j, sar me! Sar shaj anelas kadala ando kher tyiro mursh, sar zhulya? Kasavo manush, kaske sasti-j leski godyi, chi kerel kasavi mita! Kaver traba shaj avel kathe! Shaj, kadi phura zhulyake naj khonyik, thaj anda kodo las la peste tyiro mursh, sar te grizhilla, sar gugla deja.

Kade zumadas te kerel pacha e sokra.
Apol intya phirelas vi o sokro, thaj vi vov andre gelas kaj e bori. Dikhlas kodolaki brigasli musura. Chuisarelas pe kodi, kamlasas te zhanel so pecindas, thaj von phendine leske sa. Atunchi vi le phure manushes interestno kerdyilas o pecipe, thaj kamlasas te dikhel o somnalo dyelo. Vi ande peske vasta lasla, ba chi dikhelas ande kodi na terni, na phuri, na zhungali, na shukar zhulya -, numa jekh bares phure manushes, kon intregones kasavo sas, sar vov.

- Chi dikhenas tume mishto! Aketa, kado o phuro vechino-j!
Le duj zhulya atunchi avriassanasles. Palesh andre dikhlas andej glinda, vi jekh, vi kaver, - thaj zurajvenas ande pengo chachipe. Numa kodo na hatyarenas von, sar shaj kodo, hoj jekhfar terni, jekhfar phuri musura mezil pej glazha. Palunes sa trinzhenes kade gindisarenas, shaj pogano biuzho khelelpes lenca, thaj na unzhona majbutivar la glindate.

Pe jekh dyes kothe khelelas lende le khereske rajesko shavo, kon deshe bershengo sas. Arakhlas e glinda, thaj kamlasas te zhanel, so si kodi? Ande vast las, dikhlasla. Jekh kavere shaves dikhelas ande kodi, kon labda lelas pe pesko vast, sar vov. Kodo patyalas: o strejino shavo las-tar lestar lasko khelimata, thaj bare glasesa te rovel kezdindas. 

Lesko amal, kon kothe beshelas pasha leste, pushlas lestar: sostar rovel, kanak chi azbajlasles khonyik? Kanak zhanglas kodo, hoj leske amalestar las varikon o khelimata, xolyarnyiko kerdyilas. Andre dikhlas andej glinda, thaj jekh bare, zurale shaves dikhelas, kon aba sodebershengo sas, sar vov. 

Te cipisarel kezdindas lesa, vurlyalas, palunes kade das palma les, sar e glinda ande le kotora praphadyilas.
Kade kerdyilas agor la pogana glindake, so but maripe kerdas andej familija...

(Boldasles: Pató Selam)




Nema komentara:

Objavi komentar