POEMA - E DZILJI: " KHAMESER MANUSA"
Ano iranipe gadjikane chibjate:
" LJUDI SUNCA "
Pecatimij tani ani cedalin dziljengir:
"DZIVDIPE MASKARO ROMA"
Ki romani chib 1988. bers.
Kotar autori: SELJAJDIN SALIJESOR.
Ikaldza:Jekhutni atar kultura thaj sikavdipe – Preševa
Taro,Lilvarno Resipe -dzilabdenger gajakongor "FENIKS" Preševa
"KHAMESER MANUSA"
Diveste, kanao kham ustela,
Sar vrsniko, upri phuv, te bijandjol,
Odola kalje manusa, oljeja vastestar doljisajlje.
Manusa, kaser bala i bavlal pacari,
O kham tacari, a o borsin sapanceri.
Oljenger bala barilje, naupre vazdime,
Oljenger jacha zoralje, a pe danda, icerena stegime.
O vasta oljenger, kotar kham dolime, bersencar,
Oljeja phiravde, nisar oljestar, nane ulavde,
So ov, oljendjej tano, hanikh dzivdipase.
Oljengir morti kaljardi, kotar kham thabilji,
Oljenger hapja, so po buter dzana,po chinde,
Kotar phuv durjarde, ki phuv, bi taknime.
Ka terdjol lji, o kham, a oljeja hem o manusa,
Te dahinen, pe chinde canga, kotar kham,te meken,
Pe thabljarde vasta, te phraven, pe kalje jacha,
Te meken, pe zoralje danda,
Te haroven, pe vazdime bala.
Adala manusa, pani te pijen, pi jag te mudaren,
Sar i kiresin(tresnja) nilajesir, pe luludza, kana phravela.
Ko odova drumo i ljen kote nakhela,
O manus, kote terdjola, po muj te thovel,
Pani te pijel, tali kiresin (tresnja) te besel,
Luludjengir diha te pijel,
Gudlo sojba te sovel.
Odola manusa, kotar jag te nasen,
Ki phuv te peren, o kham te achaven,
Korkoro te phirel. Sose,odola manusa?
Nane bijande, kotar kham te thabljoven,
Thaj salde, oljeser te oven.
Ol dzanena dzilji te dzilaben, cefi te ceren,
Gudlo dikhiba, manusese te den,
Oljenger vasta, buti te ceren,
Oljenger jacha, phravde te oven,
Sar sa o manusa, dzivdipe dzanena hem ol te ceren,
Pa sose, e khame, kotar vas te iceren?
O kham, oljengir morti te tharel,
Pani te pijen, maro te na han.
Ka terdjol lji, o kham, te terdjon, te terdjon,
O manusa, po vodji te ljen, pe asva te kosen.?
Sose oljenger morcakir jag mudarel,
Upri phuv asva, sar borsin choren,
O manus talo late, po gudlo sopjba te ljel.
Sa ol,j ekhavde phiren,
Andor sumnalipe ko sa o rigja daktime,
Atar vas, ko kham dolime.
Oljengir morti o kham tharel,
Oljenger kokala sucarel,
I bavlal, oljenger seja nasaljel,
A o borsin oljenger kokala, andi phuv parunel.
Kotar, oljenger kokala,
Buthvar, nevi kiresin, (tresnja)ka phravel,
I ljen, kote ka nakhel,
Sa,o manusa, chera te ceren,
Talo late te besen,
Dzivdipe te nakhaven.
Kotar oljenger asva,
O djiv thaj o muruzi te barjol,
Thaj kotar phuv, pani te ikljol.
Manusenger chave, maro, kotar djiv te han,
Kotar phuv, pani te pijen,
Panjeja i daj, pe chaven, te nandjari,
Djiveja, pe chaven, te parvari.
A kana o kham, maskaro duj rigja nasaldjol
Kalji rath, upro manusenger chera perel,
O manusa, tali kiresin (tresnja) te besen,
Bare suze dzilja, ko cemane te basaljen,
A o tikore chave, gudlo sojba te soven,
A oljenger daja, baro horo ciden.
Hujljije tane, akala manusa,
So o kham, oljengir morti thardza,
A i bavlal, oljenger bala vazdindza,
O borsin, oljenger kokala parundza,
Ko odova than, kotar oljenger kokala,
I kiresin (tresnja) so barilji, kotar oljenger asva,
I ljen, po bari, so ulji?. Oljengor hapi,
Kana ulo, bi fordimo, oljengor muj, bi phravdo,
O cemane, pi gudlji dzilji terdzardje,
A e chavenger daja, o horo chinadje.
I kalji rath, hor khudza ano chera,
A o tharsime (sevkime) cerenja, upro kiresinja (tresnje) pelje,
Sa oljenger muja tharsindza (sevkindza)
Hujljije tane akala manusa. Sose,e khameja?
Saj te phiren, dur, kotar pi phuv, te oven,
Ki akija, kalji rath, talo kiresinja (tresnje) gudlo sojba soven,
Sare ,ko jekh than, jekhavde te dahinen,
Tajsa palje, e khameja, te usten,
Oljeja te phiren,
Hujljije tane, akala manusa.
autor: SELJAJDIN SALIJESOR
Nema komentara:
Objavi komentar